د کورنۍ د غړو يوځای کېدل (Familienzusammenführung)

د کورنۍ د غړو يوځای کېدل په دې مانا دي چې په جرمني کې د مېشت يوه کس کډوال يا جرمني وګړي د کورنۍ نور غړي له بل هېواد څخه راشي او دلته له دوی سره یوځای شي. دې کار ته په جرمني ژبه کې (Familiennachzug) هم وايي. په دې اړه نور مالومات زموږ په مالوماتي څپرکي (د کورنۍ د غړو يوځای کېدل) کې لوستلای شئ.

فرضي سند يا مثنی (Fiktionsbescheinigung)

که د چا د استوګنې د اجازې وخت تېر شوی وي، د يوې لنډې مودې لپاره فرضي سند ورکول کيږي او په وسيله يې په جرمني کې د ژوند کولو اجازه ورکول کيږي. فرضي سند هغو بهرنيانو ته ورکول کيږي چې د دايمي استوګنې د اجازې ترلاسه کولو يا وخت اوږدولو غوښتنه يې کړې وي خو اړونده ادارې ونه شي کړای اوس دوی ته د استوګنې اجازې د ورکړې په اړه پرېکړه وکړي.

د فرضي سند په مرسته د بهرنيانو چارو يا اوسلنډربېهورده ادارې تر پرېکړې پورې په جرمني کې پاته کېدای شئ. په دې موده کې د استوګنې اجازې پخواني حقونه او مسؤوليتونه پر ځای دي. د دې سند موده هم د استوګنې د مودې د ثبوت او يا د تابعيت اخستلو لپاره معتبره ده.

د هوايي‌ ډګر پروسه (Flughafenverfahren)

د هوايي ډګر پروسه د پناغوښتنې يوه ځانګړې پروسه ده چې د نړيوالو هوايي ډګرونو د ترانزيت په برخه کې پر مخ ځي.

دا پروسه له هغو کسانو سره اړه لري چې اصلي‌ امن هېوادونو راغلي وي، معتبر پاسپورت ونه لري او يا جعلي پاسپورت لري او يا هغه کسان چې د جرمني يوه هوايي ډګر ته ته په الوتکه کې راغلي وي. دا کسان بايد همالته په هوايي ډګر کې د جرمني له سرحدي مامورانو څخه د پنا غوښتنه وکړي. په داسې حالت کې، جرمني ته له ننوتلو وړاندې د دوی د پنا غوښتنې پروسه د هوايي ډګر په ترانزيت برخه وړاندې ځي او ښايي اړونده کسانو ته هماغلته د استوګنې ځای ورکړل شي.