کولای شم د اوسبيلډونګ د لټون ويزه ترلاسه کړم؟

که څوک د خپل وطن د ښوونځيو د فراغت داسې سند ولرئ چې په وسيله يې په پوهنتون کې د زده‌کړو اجازه ولرئ؛ کولای شئ په جرمني کې د اوسبیلډونګ موندلو لپاره د استوګنې اجازې غوښتنه وکړئ. د دې تر څنګ مو عمر بايد له ۲۵ کالونو لوړ نه وي.

چېرته د ويزې غوښتنه کولای شم؟

که د جرمني ويزې ته اړتيا لرئ، بايد‌ خپل هېواد يا سيمه کې د جرمني سفارت يا کنسولګرۍ سره وخت واخلئ او د ورتګ پر مهال اړين سندونه له ځان سره يوسئ. په ياد مو وي چې د ويزې ترلاسه کول ښايي ډېر وخت ونيسي.

که ويزې ته اړتيا نه لرئ، جرمني ته له راتګ وروسته بايد د بهرنيانو چارو په اړونده اداره (Ausländerbehörde) کې د اوسبيلډونګ د لټون لپاره د استوګنې د اجازې غوښتنه وکړئ.

 

دا چې د کومو هېوادونو وګړي جرمني ته د تګ لپاره ويزې ته اړتيا لري، د جرمني د بهرنيو چارو وزارت پر وېبسایټ (auswaertiges-amt.de) يې کتلای شئ.

د ويزې/استوګنې اجازې لپاره کوم سندونه غوښتل کيږي؟

زموږ په بل څپرکي (د جرمني اوږدمهاله ويزه) کې د ټولو هغو سندونو لړ موندلای شئ چې د جرمني د ويزې ترلاسه کولو لپاره ورته اړتيا ده.

د اوسبيلډونګ د لټون د ويزې ترلاسه کولو لپاره لاندې اضافي سندونه هم بايد ولرئ:

 

-        له خپل هېواد څخه د ښوونځيو د فراغت داسې سند ولرئ چې په وسيله يې پوهنتون ته تلای شئ (لکه د دوولسم ټولګي شهادتنامه)؛

 

-        د جرمني ژبې د زده‌کړې سند  درلودل؛ د دې کار لپاره بايد لږ ترلږه د جرمني ژبې B2 سند ولرئ؛

 

-        د اوسبيلدونګ د لټون په موده کې د ژوند د لګښتونو پوره کولو د توان ثبوت.

جرمني ته له تګ وروسته څه کيږي؟

جرمني ته له راتګ وروسته بايد‌ د دريو مياشتو په موده کې د بهرنيانو چارو په اړونده اداره (Ausländerbehörde) کې ځان ثبت کړئ او د استوګنې د اجازې غوښتنه وکړئ. د دې کار لپاره بايد د پورته يادو شوو سندونو تر څنګ، په جرمني کې د ثبت او کرايي کور د سندونو په ګډون ټول سندونه له ځان سره ولرئ. په ياد مو وي چې د دې ادارې کارکوونکي ستاسې غوښتنه ارزوي او دا ارزونه ښايي څو مياشتې وخت ونيسي.

د اوسبيلدونګ په لټون پسې راغلي خلک په جرمني کې د شپږ مياشتو پاته کېدلو اجازه لري. په دې شپږو مياشتو کې د خپلې خوښې  او وړ اوسبيلډونګ پلټنه وکړئ. د دې مودې پر مهال د کار اجازه نه لرئ. کله چې وړ اوسبيلډونګ ومومئ، بايد له اوسلنډربېهورده ادارې څخه د اوسبيلډونګ لپاره (Aufenthaltserlaubnis zum Zweck der Ausbildung) د استوګنې د اجازې غوښتنه وکړئ. د دې اجازې له ترلاسه کولو وروسته کولای شئ په جرمني کې اوسبيلډونګ ترسره کړئ.

که اوسبيلډونګ ونه مومم څه پېښيږي؟

که د ټاکل شوو شپږو مياشتو په موده کې اوسبيلډونګ ونه مومئ، بايد جرمني پرېږدئ او خپل هېواد ته ولاړ شئي. د بلې ويزې ترلاسه کولو لپاره بايد په خپل وطن کې  شپږ مياشتې انتظار وکړئ. له دې مودې تېرېدو وروسته، د اوسبيلدونګ د لټون لپاره د جرمني له سفارت څخه د بلې ويزې ترلاسه کولو غوښتنه کولای شئ.