نظريه

د هنډبوک جرمني تر شا نظريه

هنډبوک جرمني (Handbookgermany.de) د کډوالو او جرمني ته د نوو راغلو کسانو لپاره يو مالوتي چوکاټ دی چې  له کډوالو سره په ګډه او نږدې کار کوي. زموږ د همکارانو ډله په څو ژبو شته مالومات راغونډوي او له نويو راغلو کسانو سره د مخامخ اړيکې له لارې د باور وړ مالومات خپروي.

په فېسبوک، ټويټر وټزاپ، انسټاګرام او وېبلاګونو  کې د همژبو کسانو تر منځ د مالوماتو خپرولو او مرستې په موخه ګڼ ګروپونه جوړ شوي خو ډېر وخت ناسم او غير دقيق مالومات خپروي. په (هنډبوک‌جرمني) کې موږ لومړی لاس او د باور وړ مالومات وړاندې کوو.

موږ په جرمني کې د ژوند، زده‌کړو،کار او قوانينو په اړه اساسي مالومات وړاندې کوو. موږ کولای شو د (څنګه کولای شم د کار اجازه تر لاسه کړم؟) يا (په جرمني کې پوهنتون ته څه ډول نوم‌ليکنه وکړم؟) په شان لومړنۍ پوښتنې په چټکۍ او آسانه ځواب کړو. موږ همدا شان د (که ټرېن ته بې‌ټيکټه وخېژم څه پېښيږي؟) يا (د سوسيال کورونو اجازه څه ده او څنګه يې تر لاسه کړم؟) په شان پوښتنو ته هم ځوابونه ورکوو.

په ځانګړې توګه سيمه‌ييز مالومات او وړانديزونه د نوو راغلو کسانو لپاره مهم دي؛ ځکه نو د هنډبوک‌جرمني پلټونکی ماشين په دې برخه کې له تاسې سره مرسته کوي.

موږ څه ډول کار کوو

په اصل کې هنډبوک جرمني وېبسایټ د ځيرمنو موبايلونو لپاره برابر شوی دی. موږ د ټولنيزو رسنيو له چينلونو سره همغږي لنډ مالوماتي متنونه او په آسانه ترلاسه کېدونکي مالومات برابروو. موږ همدا شان لنډې مالوماتي ويډيوګانې هم خپروو.

پلټونکي د باور وړ مالوماتو موندلو لپاره د فېسبوک، واټزاپ، ټويټر، يا يوټيوب په شان د ټولنيزو رسنيو ګروپونو او پاڼو ته ځي. هنډبوک جرمني هم تاسې ته پر وېبسایټ سربېره د دې چينلونو له لارې مالومات وړاندې کوي.

د (Neue deutsche Medienmacher) اداره د هنډبوک جرمني د منځپانګې مسؤوله ده. دا اداره د کډوالۍ د شاليد لرونکو او جرمني رسنيو د مسلکي متخصصانو بنسټ دی چې په رسنيز ډګر کې د تنوع لپاره مبارزه کوي او د جلاوطنه ژورنالستانو ملاتړ کوي.

د هنډبوک جرمني پروژه د فدرالي حکومت د مهاجرت، کډوالو او ادغام د کمېشنر له لوري تمويليږي. د هنډبوک جرمني جوړښت او فعاليت د ټليکام او اډوبي په همکارۍ پر مخ ځي.