ايستل يا ډيپورټ (Abschiebung): که د چا د پنا غوښتنه رد شي؛ له پناغوښتونکي غوښتل کيږي چې له جرمني ووزي. که اړوند کس د ټاکل شوې مودې د ننه په خپله خوښه هېواد پرې نه ږدي؛ له جرمني نه ايستل کيږي. دا ايستل ډېر وخت په زور وي او ښايي له پوليسو مرسته وغوښتل شي. له ايستلو وروسته دا کس بيا جرمني ته د راتګ اجازه هم نه لري او که له اجازې پرته راشي؛ قانوني چلند ورسره کيږي. د دې ممنوعيت موده محدوده ده.
د بهرنيانو چارو اداره (Ausländerbehörde): د بهرنيانو چارو ادارې په اړه لاندې وګورئ.
پنا (Asyl): پنا هغه خونديتوب دی چې دولتونه يې تر شکنجه لاندې کسانو ته ورکوي. هغه کسان چې تر تعقيب لاندې دي؛ په کوربه هېواد کې د دايمي اوسېدو غوښتنه کوي. د دې کار لپاره د پناغوښتنې اړتيا ده. د دولت مسؤولين هره دوسيه څيړي او د اسنادو له مخې پرېکړه کوي چې پنا ورکړي که نه او که هو نو کوم ډول. که څوک په جرمني کې پنا ترلاسه کړي؛ دلته اوسېدلای شي.
د استوګنې قانون (Aufenthaltsgesetz): په جرمني کې د بهرنيو کسانو مهاجرت د استوګنې د قانون (Aufenthaltsgesetz) له مخې تنظيميږي. دا قانون جرمني ته د راتللو، وتلو، اوسېدنې، ادغام او کار مقررات هم روښانوي.
د استوګنې اجازه (Aufenthaltstitel): کډوال په جرمني کې د اوسېدو لپاره د استوګنې اجازې ته اړتيا لري. په جرمني کې د استوګنې بېلابېلې اجازې شته چې له د دايمي او لنډمهاله اوسېدنې اجازې پکې شاملې دي. د دايمي اجازې له مخې مهاجر کولای شي د جرمني په هر ځای کې ژوند يا کار وکړي.
د بهرنيانو چارو اداره (Ausländerbehörde): دا اداره جرمني ته د ټولو مهاجرتونو مسؤوله ده. د جرمني په ټولو ښارونو کې دا اداره د استوګنې په اړه ستاسې پوښتنو ته ځواب وايي. دا اداره د بهرنيانو د دايمي يا لنډمهالې استوګنې، ډيپورټ، ډولډونګ او ويزا په اړه پرېکړه کوي.
