له جرمني نه ايستل کېدل يا ډيپورټ

آیا زه له به له جرمني وايستل شم؟

Abschiebung

که د پنا غوښتنه مو ونه منل شي او رد ځواب ترلاسه کړئ او يا هم د استوګنې درکول شوې اجازه له لاسه ورکړئ؛ اړ ياست چې جرمنی پرېږدئ. په داسې حالاتو کې د مهاجرت او کډوالۍ فدرالي اداره (BAMF) له تاسې غواړي چې په ټاکل شوې موده کې جرمنی پرېږدئ. دوی به همدا شان تاسې ته د پناغوښتنې قانون د ۳۴مې مادې له مخې د ډيپورټ اخطار درکړي. دا اداره به تاسې د (Abschiebungsandrohung) په نامه د ډيپورټ د حکم رسمي خبرتيا وليږي. په دې خبرتيا کې به د ډيپورټ لپاره ټاکل شوی منزل په نښه شوی وي. له ډيپورټ مخکې د دې خبرتيا لېږل اړين دي او که له وړاندې چا ته ولېږل شي؛ هغه بايد ډيپورټ نه شي. د اصولو له مخې د پناغوښتنې د قضيې له رد وروسته د بمف اداره د ډيپورټ حکم او د رد ځواب پر يوه وخت لېږي. د ډيپورټ حکم د ثبت شوي ليک په توګه لېږل کيږي او بمف پوهيږي چې دا ليک څه وخت ستاسې پوست‌بکس ته رسيږي.

د پناغوښتنې د ساده رد پر مهال تاسې درې ورځې وخت لرئ چې د ۳۰ ورځو په موده کې جرمنی په خپله خوښه پرېږدئ. که د پناغوښتنه مو د نه منلو وړ (unzulässig) قضيې يا بې‌بنسټه (offensichtlich unbegründet) قضيې له مخې رد شي؛ يوازې يوه اونۍ وخت لري چې جرمني پرېږدئ. که د دوبلين د قوانينو له مخې مو بل اروپايي هېواد د پناغوښتنې د قضيې مسؤول وي؛ د پنا غوښتنه به مو نه منلو وړ قضيې په توګه رد شي. که بمف ومومي چې په د پناغوښتنې په قضيه کې مو څرګند تناقضات شته او يا جرمني ته د اقتصادي دلايلو له مخې راغلي ياست نو ښايي د پنا غوښتنه مو د بې‌بنسټه قضيې په توګه رد شي. د دې لپاره چې ومومئ څومره وخت لرئ؛ د بمف ليک په غور ولولئ. دا وخت د ليک ترلاسه کولو له نېټې پیليږي.

که د پنا غوښتنه مو رد شوې وي؛ بيا هم ځينې لارې چارې شته چې په جرمني کې پاته شئ. د ډيپورټ د حکم له ترلاسه کولو وروسته بايد له يوه وکيل يا مشورتي مرکز څخه سلا مشوره ترلاسه کړئ. په دې اړه زيات مالومات د پنا غوښتنې ردېدل په څپرکي کې ولولئ.

که څوک په ټاکل شوې موده کې په خپله خوښه جرمنی پرې‌نه‌ږدي او ډيپورټ د مخنيوي لپاره نور ګامونه هم وانه خلي؛ ښايي له پوليسو د مداخلې غوښتنه وشي او اړوند کس په زور خپل وطن يا درېيم هېواد ته چې هغه يې منلی وي او يا ورسره اړيکې ولري (د بېلګې په‌ ډول پخوا هلته اوسېدلی وي)؛ ولېږل شي. دې پروسې ته ډيپورټ (Abschiebung) يا بيا وطن ته لېږل (Rückführung) وايي. د ډيپورټ قانون د استوګنې قانون د ۵۸مې مادې له مخې تنظيميږي. ډيپورټ يوازې په هغه وخت کې ترسره کيږي چې د په نښه شوي بېرته لېږل شوني وي او قانوني خنډ ونه لري. ځکه نو له لېږلو مخکې ټول قانوني يا فزيکي خنډونه ارزول کيږي. د هرې سيمې د بهرنيانو چارو اداره (Ausländerbehörde) د اړونده کسانو د ډيپورټ مسؤوليت لري. که له جرمني څخه د چا ايستل د قانون په وسيله منع شوي وي او يا په عمل کې ناشوني وي؛ دا اداره به د زغمل شوې استوګنې سند (Duldung) او يا د استوګنې اجازه ورکړي. په دې اړه زيات مالومات د پنا غوښتنې ردېدل په څپرکي کې ولولئ.

په څه شي بايد ځان وپوهوم؟

د کومو کسانو د ډيپورټ کېدلو شونتيا شته؟

د ډيپورټ پروسه کومې مرحلې لري؟

څوک د ډيپورټ په مرکزونو کې اچول کيږي؟

د ډيپورټي بند (Abschibungshaft) په موده کې کوم حقونه لرم؟

پوليس مو د ډيپورټ له نېټې مخکې هم نيولای شي؟

ډيپورټ کومو ځايونو ته کيږي؟

ډولډونګ لرونکي کسان هم ډيپورټ کېدای شي؟

ډيپورټ کېدل څه پایلې لري؟

ډيپورټ کېدونکي کسان څه کولای شي؟

له ډيپورټ وروسته څه کول په کار دي؟

مهم

فدرالي ايالتونه د ډيپورټ مسؤوليت لري. هر ايالت په خپلواک ډول پرېکړه کوي چې څوک ډيپورټ کړي. ځينې ايالتونه ډېر کسان ډيپورټوي خو په ځينو نورو کې دا چاره ورو روانه ده. تاسې ښايي ځينې وخت په ځانګړو ايالتونو کې د ډيپورټ په اړه واورئ خو دا په دې مانا نه ده چې تاسې به هم خامخا ډيپورټ کېږئ.