د CDU/CSU ګوند د جرمني د مسيحي دموکراتيک اتحاد (Christlich Demokratische Union Deutschlands) او ټولنيز مسيحي اتحاد (Christlich-Soziale Union) له يووالي رامنځته شوی دی. دا دواړه ډلې د جرمني په پارلمان کې په ګډه يو له بل سره کار کوي. د CSU ګوند يوازې په بايرن ايالت کې فعال دی خو د CDU ګوند بيا په نورو ۱۵ ايالتونو کې فعاليت لري.
د CDU ګوند رنګ تور دی او بنسټ يې له دوهم نړيوال جنګ وروسته د ګڼو ټولنو او محافظهکارو ګروپونو له لوري کېښودل شو. دا ګوند د ولسي ګوند (Volkspartei) په نوم پېژندل کيږي او په ټولو ټولنيزو طبقو او ډلو کې پلويان لري. دا ګوند ړ ۲۰۱۶ کال له شمېرو سره سم ۴۳۱٬۹۰۰ غړي لري.
د CSU ګوند د ۲۰۱۶ شمېرو له مخې ۱۴۲٬۴۰۰ غړي لري. د دې ګوند رنګ روښانه آسماني دی. له دې سره چې دا دواړه ګوندونه په ګډه يو له بل سره کار کوي؛ په ځينو مسايلو کې يو له بل سره جوړ نه دي. د بېلګې په ډول CSU د مهاجرو په اړه سخت دريځ لري.