بېلابېل جنسي هويتونه (LGBTIQ)

د څېړنو له مخې په جرمني کې همجنسبازان يا LGBTIQ د ټولنې د ډېری وګړو له لوري منل کيږي. له دې سره سره له دوی ډېر وخت ناوخت له تبعيض سره مخ کيږي. البته تاسې کولای شئ د دې دښمنۍ او تبعيض پر وړاندې قانوني ګامونه واخلئ. که څوک په جرمني کې د جنسي هويت يا لېوالتيا له کبله ځورول کيږي؛ کولای شي له تبعيض ضد ادارې سره اړيکه ونيسي. د جرمني د تبعيض ضد قانون د ټولو هغو کسانو ملاتړ کوي چې د رنګ، جنس، دين، معلوليت، عمر يا جنسي لېوالتيا له مخې له تبعيض او توپير سره مخ کيږي. که څوک د کور موندلو، کار موندلو يا کار کولو پر مهال، يا رستورانت، کلب، بانک يا هټۍ ته د ورتګ پر وخت له تبعيض سره مخ شي؛ کولای شي له پورته يادې شوې تبعيض ضد ادارې سره اړيکه ونيسي او د اړوندو کسانو د چلند په اړه خبر ورکړي. دا اداره به تاسې ته ووايي چې د هغه کس يا کسانو پر وړاندې څه کولای شئ.

د دې ادارې کارکوونکي د دوشنبې په ورځ د ماسپښين له ۱ تر درې بجو او د چهارشنبې په ورځ د سهار له ۹ تر ۱۲ بجو په (030-185551855) شمېره ستاسې ټليفوني اړيکو ته ځواب وايي. دوی ته همدا ډول په (beratung@ads.bund.de) پته برېښناليک هم استولای شئ. د دې ادارو کارکوونکي په جرمني، انګليسي او عربي ژبو خبرې کوي. د تبعيض ضد ادارې پر وېبسایټ، په خپل شاوخوا کې د دې ادارې يوه څانګه موندلای شئ.

يادونه: که څوک له ژبني، فزيکي يا جنسي تېری سره مخ او يا يې تر ګواښ لاندې وي؛ کولای شي سملاسي په ۱۱۹ شمېره له پوليسو بېړنۍ مرسته وغواړي.

د ۲۰۱۷ کال د اکتوبر له لومړۍ نېټې راهيسي همجنسې جوړې کولای شي د مخالفو هغو په شان د واده کولو له حقوقو ګټه واخلي. له دې وړاندې دوی يوازې کولای شوای خپله اړيکه د مدني يا ژوند ملګرتيا (Lebenspartnerschaft) په نامه ثبت کړي. دا ملګرتيا هم واده ته ورته وه خو کټ مټ د واده په شان نه وه. د ۲۰۱۷ کال له اکتوبر راهيسې دا جوړې کولای شي خپله ملګرتيا په واده واړوي او دا کار بايد د ثبت په دفتر (Standesamt) کې وکړي. د واده او نورو ورته موضوعاتو په اړه زيات مالومات زموږ د په جرمني کې واده کول په څپرکي کې موندلای شئ.

که څوک په خپل وطن کې د جنسي لېوالتيا يا جنسي هويت له کبله څارل شوي وي او يا يې ژوند په خطر کې وي؛ کېدای شي په جرمني کې د پنا غوښتنه وکړي. همدا شان که څوک د بند له سزا يا غيرانساني چلند سره مخ وي؛ ښايي د کډوال يا پناغوښتونکي په توګه پنا ترلاسه کړي. البته دا ګواښونه بايد ډېر جدي وي. په ياد مو وي چې يوازې د ځورولو يا څارلو قضيه کافي نه ده. تاسې بايد بمف ته د مرکې پر مهال ثابته کړئ چې له پورته يادو شوو جنسيتونو يو لرئ او په خپل وطن کې مو ژوند په رښتيا تر ګواښ لاندې و. بمف (BAMF) به ستاسې په هېواد کې د دې کسانو حالت ته په کتو ستاسې په اړه پرېکړه وکړي. ستاسې د قبولۍ چانس ستاسې د هېواد له حالت او ستاسې له ثبوتونو سره اړه لري. البته غوره ده چې له پنا غوښتنې وړاندې له يوه وکیل يا مشورتي ادارو سره سلا وکړئ. د (queer-refugees.de) او (VLSP) پر وېبسایټونو خپل ځان ته نږدې يو مشورتي مرکز موندلای شئ. د پنا غوښتنې په اړه زيات مالومات زموږ د پناغوښتنې په څپرکي کې موندلای شئ.

يادونه: د بمف کارکوونکي ښايي د مرکې پر مهال له تاسې ستاسې د جنسي لېوالتيا يا هويت په اړه ډېرې شخصي پوښتنې وکړي. البته تاسې کولای شئ وټاکئ چې له يوه نارينه يا ښځينه سره مرکه کول غواړئ. د دې تر څنګ هلته د همجنسبازانو د مرکې لپاره د ځانګړې تجربې لرونکي کسان هم شته. په ياد مو وي چې له مرکې وړاندې دوی ته د خپلو غوښتنو په اړه خبر ورکړئ.

تاسې هر وخت کولای شئ د همجنسبازانو لپاره له مشورتي ادارو سره سلا وکړئ. د (queer-refugees.de) او (VLSP) پر وېبسایټونو خپل ځان ته نږدې يو مشورتي مرکز موندلای شئ. د پنا غوښتنې په اړه زيات مالومات زموږ د پناغوښتنې په څپرکي کې موندلای شئ. که له خپلو ګاونډيانو يا د کمپ له مامورينو سره ستونزه لرئ؛ له ټولنيزو کارکوونکو سره له مشورې او مرستې غوښتلو مه وېرېږئ. تاسې په خپل استوګنځي کې له اندېښنې پرته د اوسېدو حق لرئ. که ټولنيز کارکوونکي يا د کمپ مشر له تاسې سره مرسته نه کوي او يا خپله د ستونزې برخه وي؛ په خپل شاوخوا کې له يوه مشورتي مرکز سره اړيکه ونيسئ.

د پنا  غوښتلو پروسې پر مهال: د پناغوښتنې د پروسې په سر کې به تاسې په يوه ځانګړې سيمه يا ښار کې مېشت کړل شئ. تر هغې چې له سوسياله مرسته ترلاسه کوئ؛ د اصولو له مخې بايد په هماغه سيمه کې پاته شئ. دې کار ته د استوګنې د ځای مکلفيت (Wohnsitzauflage) وايي. بلې سيمي يا ښار ته لېږدېدل يوازې په ځانګړو حالاتو کې ممکن دي. د بېلګې په ډول که د چا د ژوند ملګری/ې يا واړه ماشومان په بل ښار يا سيمه کې واوسي؛ کولای شي هغه ښار ته کډه شي او يا هغوی راولي. که څوک د خپلې اوسېدو په سيمه کې له ډېرو دښمنيو او بلد چلند سره مخ شي؛ دې ته سخت حالت (Härtefall) وايي. دا کسان کولای شي د بهرنيانو چارو له ادارې څخه د بيا مېشتېدنې غوښتنه وکړي. په دې غوښتنه کې بايد ټول هغه دليلونه وليکئ چې روښانه کړي، ولې په دې ښار کې ژوند کول درته سخت دي. البته غوره ده چې له دې کار وړاندې له مشورتي ادارو سره سلا وکړئ. د (queer-refugees.de) او (VLSP) پر وېبسایټونو خپل ځان ته نږدې يو مشورتي مرکز موندلای شئ.

پورته شرطونه د ډولډونګ لرونکو کسانو لپاره هم پلي کېدای شي.

د پنا درلودونکو يا قبولو شوو کسانو لپاره: هغه قبول شوي کسان چې لا هم له سوسيال يا جابسنتر څخه مرسته ترلاسه کوي؛ بايد تر درې کالو په هغه سيمه کې ژوند وکړي؛ کومې ته چې د پناغوښتنې د پروسې پر مهال لېږل شوي او استوګن شوي دي. بل ځای ته کډه کول يوازې په ځانګړو حالاتو کې شوني دي. د بېلګې په ډول که څوک په بل ښار کې داسې دنده ومومي چې خالص معاش يې له ۷۱۰ يورو زيات وي او ټولنيزه بيمه ورکړي؛ کولای شي بل ښار ته کډه وکړي. همدا شان هغه کسان چې به بل ښار کې زده‌کړې يا اوسبیلډونګ پیلوي؛ کولای شي بل ښار ته کډه وکړي. همدا شان که د چا د ژوند ملګری/ې يا واړه ماشومان په بل ښار يا سيمه کې واوسي؛ کولای شي هغه ښار ته کډه شي او يا هغوی راولي. که څوک د خپلې اوسېدو په سيمه کې له ډېرو دښمنيو او بلد چلند سره مخ شي؛ دې ته سخت حالت (Härtefall) وايي. دا کسان کولای شي د بهرنيانو چارو له ادارې څخه د بيا مېشتېدنې غوښتنه وکړي. په دې غوښتنه کې بايد ټول هغه دليلونه وليکئ چې روښانه کړي، ولې په دې ښار کې ژوند کول درته سخت دي. البته غوره ده چې له دې کار وړاندې له مشورتي ادارو سره سلا وکړئ. د (queer-refugees.de) او (VLSP) پر وېبسایټونو خپل ځان ته نږدې يو مشورتي مرکز موندلای شئ.