کورني ژوي

کورني حيوانات په واټونو او د جرمني په نورو عامه ځايونو کې له خلکو سره ليدل کيږي او خلک حتا ځينې رستورانتونو، کافيانو، بسونو، ټرېنونو يا ادارو ته له ځان سره د خپلو کورنيو ژويو د وړلو اجازه لري. د سپيانو ګڼ نژادونه او ډولونه او له هغو سره د خلکو چلند ښايي ځينې وخت ستاسې لپاره حيرانوونکی وي. ځينې کسان له هغو سره د ملګري یا د کورنۍ د غړي په شان چلند کوي. ځينې کسان حتا د اولادونو پر ځای کورني ژوي ساتي. زاړه يا مجرد کسان دې ژويو ته د يوه ملګري په سترګه ګوري خو کورنۍ يې له طبيعت سره د ماشومانو د اشنا کېدو او دوی ته له ژونديو موجوداتو سره د مسؤولانه چلند ورزده کولو لپاره ساتي. د کورنيو ژويو ساتلو دليل ډېر وخت له ټولنې سره اړه لري. همدا شان د کورنيو ژويو د ساتنې هڅه او لګښت ډېر وخت او تفريحي بڼه لري.

په جرمني کې د فارمي حيواناتو پر خلاف له کورنيو ژويو ځانګړې ګټه نه ترلاسه کيږي. له سپيانو او پشکيانو وروسته جرمنيان د ګينې خوګانو، موږکانو، الوتونکو، کبانو او ځينو حشرو له ساتلو سره لېوالتيا لري. ځينې کسان د ښارونو په څنډو کې د س‍پرلۍ لپاره آسان هم ساتي خو په ‌ښارونو کې د پسونو، وزو، غواګانو، چرګانو يا خوګانو په شان ژويو ساتل ناشوني دي.

په جرمني کې د هر څه په اړه قوانين شته. ځکه خو د حيواناتو د ساتنې په اړه هم ځانګړي مقررات پلي کيږي. دا چې ولې په ښارونو کې فارمي ژوي نه ساتل کيږي؛ يو دليل يې د هغوی د ساتنې او روغتيا قوانين دی. د کورنيو ژويو په ساتنه ماليه هم ورکول کيږي او بيمه کول يې هم اړين دي. د کرايې په قراردادونو کې هم د ژویو په اړه يادونه کيږي. که کورنۍ ژوی ساتئ؛ بايد مخکې له مخکې د کور خاوند ته خبر ورکړئ.

په جرمني کې د لېوني سپي په شان د ژويو له ساري ناروغيو مه وېرېږئ ځکه د هغوی د واکسيناسيون په اړه ځانګړي مقررات پلي کيږي. په جرمني کې د ژويو د صادرېدو او واردېدو په اړه هم مقررات شته. که له اروپايي ټولنې د باندې له کوم هېواد څخه جرمني ته کم سپی یا پشۍ راوړل غواړئ؛ بايد له راوړلو ۳۰ ورځې وړاندې واکسين شوي وي خو دا موده بايد له يوه کال نه وي اوښتې. د جرمني پر پوله د واکسينو د تاييد د سند غوښتنه کيږي. په جرمني کې سپيانو ته يو مايکروچېپ نصب کيږي او بايد په پارکونو او ښاري سيمو کې له پړي ونيول شي او لوبغالو او هديرو ته د وړلو اجازه نه لري.