ځوانانو چارو اداره

د ځوانانو چارو ادراې کارکوونکي ښايي د ماشوم له زېږېدو وروسته له ميندو او پلرونو سره وګوري. دې ډول ليدنې ته (مخکې له مخکې مرسته) وايي او موخه يې د مورولۍ او پلارولۍ له اندېښنو د ميندو او پلرونو ژغورنه ده. د دې کار لپاره د دې ادارې له مامورينو څخه د ماشوم د پالنې او د دوی د مشورو د ګټو په اړه پوښتنه کولای شئ. دا اداره همدا شان له زېږون مخکې د قابلو يا نرسانو په درپېژندلو کې هم مرسته کوي. د ځوانانو چارو له ادارې سره مشوره کول کولای شي مجردې ميندې او پلرونه له ډېرو اندېښنو او ستونزو وژغوري. دوی د ماشومانو لپاره د پالنځايونو په موندلو کې هم مرسته کوي. که څه هم ښايي اوس مهال د پالنځايونو موندل يو څه سخت وي خو د مرستې غوښتلو لپاره د ځوانانو چارو له ادارې سره اړيکه نيولای شئ.

ميندې او پلرونه کولای شي د مرستې غوښتلو لپار د ټولنيزو خدمتونو له سيمه‌ييزو ادارو سره په اړيکه کې شي. دا ادارې د عمومي ټولنيز خدمتونو (Allgemeiner Sozialer Dienst)  يا سيمه‌ييز ټولنيز خدمتونو (Kommunaler Sozisle Dienst) ادارو په نامه هم ياديږي. د کريتاس په شان ډېرې نورې ادارې هم دا ډول خدمتونه وړاندې کوي. په دې ادارو کې کولای شئ مشورې تر لاسه کړئ؛ په کورسونو کې ګډون وکړئ او يا له کورنيو سره د مرستې له ټولنيزو –روزنيزو آسانتياوو څخه ګټه واخلئ.

که څوک له خپلو اولادونو سره په شديد ډول او له حده زيات تشويش ولري؛ د وروستۍ ټاکنې په توګه کولای شي د ځوانانو د دارې په مرسته د ماشومانو د روزنې لپاره وړ سرپرست يا پالنځی ومومي. دا کار د لنډ وخت لپاره هم کېدلای شي. په هر حالت، د ماشوم ساتنه او هوساينه تر هر څه د مخه لومړيتوب لري.

که څوک اولاد ولري او غواړي له خپلې مېرمنې يا خاونده بېل شي يا طلاق واخلي؛ د ځوانانو چارو ادراه به له دوی سره اړينه مرسته وکړي. دا اداره به خاوند يا مېرمنې ته د هغوی د کورني حالت او راتلونکې په اړه مشوره ورکړي. په داسې حالاتو کې له مخکې يادو شوو مرستندويو ادارو سره اړيکه نيولای شئ.

له طلاق وروسته هم بايد دواړه مور او پلار د خپلو بچيانو تر ملاتړ وکړي او تر څنګ يې پاته شي. که له دواړو يو يې د ماشوم له پاللو لاس واخلي او يا پیسې ورکول ودروي؛ د ځوانانو د چارو ادراه به د ماشوم په پالنه او ساتنه کې مرسته وکړي. د ماشومانو د ساتنې او پرمختګ د قانون (Unterhaltsvorschussgesetz) له مخې په داسې حالاتو کې د ځوانانو د هوساينې ادره بايد مخکې له مخکې د ماشوم د ساتنې لپاره بوديجه بېله کړي. له دې خدمتونو د ګټې اخيستنې لپاره بايد لومړی د هغو غوښتنه وکړئ. د ۲۰۱۷ کال له جولای راهيسې د دې مرستې په موده محدوديت نشته او يوازې هغه وخت بنديږي چې اړوند مور يا پلار د ماشوم د ساتنې لګښتونه په خپله ورکړای شي. په دې حالت کې مرسته شوې پیسې بېرته غوښتل کيږي. د ماشوم لپاره د ترلاسه کېدونکو پیسو اندازه د ماشوم له عمر سره اړه لري.

د ځوانانو چارو ادراه له ناواده شوو ميندو سره د ماشوم د پلار د‌ پېژندلو په پروسه او د ماشوم د تمويل په اجرا کې مرسته کوي او دوی ته مشورې ورکوي. دې پروسې ته (Beistandschaft) وايي. همدا شان که اړتيا وي؛ د ځوانانو چارو اداره په محکمه کې له دوی څخه ملاتړ کوي.

په دې وېبسایټ کې خپل اړونده ځوانانو چارو اداره موندلای شئ.

که څوک خپل اولادونه په سمه توګه نه شي ساتلای يا نه غواړي ويې ساتي؛ د ځوانانو چارو په اداره کې د زوی‌ولۍ او لورولۍ څانګه له دوی سره د نويو سرپرستو ميندو او پلرونو په موندلو کې مرسته کوي. که تاسې غواړئ چې کوم ماشوم د اولاد په توګه ومنئ؛ بايد زښته ډېر شرايط پوره کړئ کوم چې له يوه تر بل ايالته توپير کوي. د نورو مالوماتو لپاره د ځوانانو د چارو ادراې وېبسایټ وګورئ.

د ځوانانو چارو ادراه جرمني ته له راتګ سملاسي وروسته د کم‌عمره بې‌سرپرسته ماشومانو سرپرستي پر غاړه اخلي. د ټولنيز قانون د اتم کتاب (SGB VIII) د ۴۲مې مادې له مخې د ځوانانو د چارو اداره همدا شان د هغو ماشومانو د سرپرستۍ مسؤوليت پر غاړه لري چې بايد تر پاملرنه لاندې ونيول شي. کم‌عمره ماشومان د دې ادارې تر قيموميت لاندې راځي خو بيا هم دا اداره اړه ده چې په جرمني يا بهر کې د دې ماشومانو د ميندو او پلرونو پلټنه وکړي او د ماشوم د موافقې په صورت کې د دوی د يوځای کولو هڅه وکړي.

د ځوانانو چارو اداره بايد جرمني ته د کم‌عمره بې‌سرپرسته ماشومانو له راتګ يوه مياشت وروسته کورنۍ محکمې ته خبر ورکړي. له دې وروسته به سملاسي (د دريو کاري ورځو د ننه) د ماشوم لپاره د قانوني استازي د موندلو هڅه وکړي. دا اداره د ماشوم لپاره د وړ سرپرست د پلټلو او کورنۍ محکمې ته د ځانګړي ماشوم د سرپرست (Einzelvormund) په توګه هغه د ورپېژندلو مسؤوله ده. که خصوصي سرپرست ونه موندل شي؛ په خپله د ځوانانو چارو اداره د محکمې له لوري د سرپرست بنسټ (Amtsvormund) په توګه ټاکل کيږي او د دې ادارې يوه ځانګړي کارکوونکي ته اړونده دندې سپارل کيږي. ځينې وخت د کورنۍ محکمې له لوري د سرپرست ټاکل څو مياشتې وخت نيسي.

ماشومان بايد په خوندي او ښو روغتيايي شرايطو کې وده وکړي او د ځوانانو چارو ادراه په جرمني کې د ټولو ماشومانو لپاره د دې شرايطو له پوره کېدلو ځان ډاډمنوي. که چېرې د ماشوم ګاونډيان، خپلوان، زده‌کوونکي او ښوونکي ګمان کوي چې کوم ماشوم وهل يا ځورول کيږي او يا يې پالنې ته پاملرنه نه کيږي؛ کولای شي دې ادارې ته خبر ورکړي. وروسته بيا د ځوانانو چارو ادراه د ماشوم له کورنۍ سره خبرې کوي څو د ماشوم د خونديتوب او ستونزو د حل لپاره لارې چارې ومومي. که ستونزه حل نه شي؛ ښايي ماشوم د خونديتوب لپاره له کورنۍ څخه واخستل شي او په راتلونکي کې يې د اوسېدو د ځای په اړه کورنۍ محکمه پرېکړه کوي.

په دې وېبسایټ کې خپل اړونده ځوانانو چارو اداره موندلای شئ.

د ماشوم په ساتنه کې جبري زده‌کړې هم شاملې دي. بېلابېلو ايالتونو ته په کتو؛ ماشومان بايد په ۵ تر ۶ يا ۶ تر ۷ کلنۍ کې ښوونځي ته ولاړ شي. که ماشوم ښوونځي ته نه ځي او يا ډېره غيرحاضري کوي؛ د ځوانانو چارو ادراه به يې په اړه اړين ګام پورته کړي. کډوال او مهاجر ماشومان هم په جبري زدکړو کو شامل دي. په اصل کې کډوال ماشومان بايد جرمني ته له راتګ له دريو تر شپږ مياشتې وروسته ښوونځي ته ولاړ شي. که دې ماشومانو د راتګ پر مهال خپله تذکره يا د پېژندنې اسناد ورک کړي وي او يا يې ونه لري؛ د ځوانانو چارو ادره به د دوی عمر وټاکي.

د ځوانانو د چارو ادراه د ځوانانو لپاره ځانګړي ټولنيز خدمتونه وړاندې کوي. دا ادراه نويو ځوانانو ته له ښوونځي د باندې تفريحي، کلتوري او پوهنيز پروګرامونه جوړوي څو د دوی تر منځ پر ځان باور، خپلواکي او ټولنيزه همکاري پياوړې شي. دا اداره همدا شان په ټولنيزو اړيکو کې له شاته پاته او محرومو ماشومانو او نويو ځوانانو سره مرسته کوي څو د مشورو، کاري ملاتړ، او ټولنيز – روزنيز کار له لارې يوه دنده پیل کړي او بېرته له محروميته راووزي.

د ځوانانو چارو اداره د ماشومانو او نويو ځوانانو د خونديتوب په پار هغوی ته د الکولو او نشه‌يي توکو د زيانونو په اړه خبر ورکوي او د ناوړه رسنيزو توکو (کمپيوټري لوبې او انټرنېټي مواد) له کتلو او کارولو يې راګرځوي. همدا شان دا اداره د دوی د کاري خونديتوب مسؤوليت پر غاړه لري.

د جرمني د اساسي قانون له مخې له پنځلس کالو ټيټ کسان د کار کولو حق (Beschäftigungsverbot) نه لري. له ۱۵ کالو د لوړ عمر زده‌کوونکي کولای شي د رخصتيو په ورځو کې کار وکړي او د دوی خونديتوب د ماشومانو د کاري روغتيا او خونديتوب قانون (Jugendarbeitsschutzgeset يا Kinderarbeitsschutzverordnung) په وسيله ساتل کيږي. د بېلګې په ډول د دې قانون له مخې ماشومان په کار کې د درنو بارونو د پورته کولو اجازه نه لري.

که د ۱۴ او ۱۷ کالو عمرلرونکو ځوانانو تر منځ (ځينې وخت د اتلس او شل کلو تر منځ) کوم کس جرم وکړي؛ قضيه يې د نويو ځوانانو محکمې ته لېږل کيږي. په داسې حالاتو کې د ځوانانو چارو اداره د محکمې او ماشوم تر منځ د منځګړيتوب رول لوبوي او د د جرمونو د بيا پېښېدو د مخنيوي لپاره دوی ته روزنه ورکوي.

که ماشومان يا نوي ځوانان د ميندو او پلرونو له لوري ووهل شي؛ ناوړه چلند ورسره وشي او يا له جنسي ځورونې سره مخ شي؛ کولای شي د پوليسو بېړنۍ شمېرې (۱۱۰) ته زنګ ووهي. د دې تر څنګ ځينې نورې بېړنۍ شمېرې هم شته چې ماشومانو ته مشورې ورکوي. دا ماشومان يا نوي ځوانان همدا شان کولای شي د(NummergegenKummer) فدرال شمېرې ته هم په ۱۱۶۱۱۱ شمېره ټليفون وکړي. دې شمېرې ته ټليفون کول او له دوی مشوره اخيستل وړيا دي او ستاسې هويت پټ ساتل کيږي خو په خواشينۍ چې دا خدمتونه يوازې په جرمني ژبه دي.

د جرمني په ځينو سيمو کې په ګڼو ژبو بېړنۍ شمېرې فعالې دي. که تاسې په هغه ښار کې ژوند هم نه کوئ؛ کولای شئ زنګ ورته ووهئ. د بېلګې په ډول (د برلين د ماشومانو بېړنی خونديتوب) ۰۳۰۶۱۰۰۶۶ شمېرې ته ۲۴ ساعته زنګ وهلای او په جرمني، ترکي، روسي او عربي ژبه مشوره اخستلای شئ.

د مېرمنو د ستونزو لپاره د برلين (Frauenkrisentelefon) د اړيکې شېمره (۰۳۰۶۱۵۷۵۶۹) د دوشنبې په ورځ د سهار له ۱۰ تر ۱۲ بجو په جرمني، انګليسي او دري ژبو مشورې ورکوي. نجونې او مېرمنې کولای شي د ښځو پر وړاندې د تاوتريخوالي Gewalt gegen Frauen  د مرستې شمېرې (۰۸۰۰۰۱۱۶۰۱۶) ته زنګ ووهي او په څو ژبو مشوره تر لاسه کړي.