د دندې لپاره د جرمني ژبې کورسونه

د جرمني ژبې د زده‌کړې لپاره د کار اړوند ډېر کورسونه شته. په اساسي موډلونو کې کولای شئ د جرمني ژبې عمومي مهارتونه لوړ کړئ. په ځانګړي موډل کې بيا کولای شئ په ځانګړو برخو تمرکز وکړئ. په اساسي موډلونو کې کولای شئ د جرمني ژبې د B1، B2 يا C1 په کچه کورس ته ورداخل شئ او د C2 تر کچې زده‌کړه وکړئ . په ځانګړو موډلونو کې د بېلګې په ډول د دندې اړوند تخنيکي او حرفوي اصطلاحات زده کولای شئ. که لا مو هېڅ ژبه نه وي زده کړې؛ کولای شئ دا ځانګړي موډلونه له A1 يا A2 کچې پیل کړئ. 

که څوک لاندې شرطونه پوره کړي؛ کولای شي د دندې لپاره د جرمني ژبې کورس ووايي:

• په جرمني کې د استوګنې اجازه ولري؛
• په انټګراڅيون کورس کې يې ګډون کړی وي او يا په دې کورس کې له ګډون پرته يې تر B1 کچې پورې جرمني ژبه زده وي؛
• له جاب‌سنټر يا د کار له ادارې سره د کار پلټونکي کس په توګه ثبت وي؛ د اوسبیلډونګ په لټه وي؛ اوسبيلډونګ ترسره کوي او يا يې له وطنه د زده‌کړو راوړي سندونه په جرمني کې رسمي کړي وي.

په ياد مو وي چې: که څوک له د سوريې، ايران، عراق، اريتريا يا سوماليا په شان له هېوادونو راغلي وي؛ کولای شئ د پنا غوښتنې د قضيې په دوران کې هم د دندې لپاره د جرمني ژبې د زده‌کړې کورس ووايي خو شرط دا دی چې بايد تر B1 کچې پورې يې جرمني ژبه زده کړې وي.

له دې پرته هغه کډوال چې کار لري خو د جرمني ژبې مهارتونه يې د ژبې لپاره کفايت نه کوي؛ کولای شي په دې ډول کورسونو کې ګډون وکړي.

که د دندې لپاره د جرمني ژبې کورس ترسره کولو اجازه لرئ؛ کولای شئ په جاب‌سنټر يا کار اداره کې له خپل اړوند مامور سره خبرې وکړئ. که وړ وګڼل شئ؛ له ياد شوي مامور څخه به په کورس کې کې د ګډون يو ليک (Bildungsgutschein) ترلاسه کړئ. له دې ليک سره کولای شئ په خپل شاوخوا کې يوه کورس ته ورشئ او ځان ثبت کړئ. دا چې کوم کورسونه د دندې لپاره د جرمني ژبې ټولګي لري؛ اړوند مامور درته ویلای شي. د دې تر څنګ په انلاين ډول پر KURSNET-Website هم دا ډول يو کورس پلټلای شئ.

که کار کوئ او د کارپلټونکي په توګه مو ځان نه وي ثبت کړی؛ کولای شئ له خپل رييس څخه وپوښتئ چې په کورس کې د ګډون اجازه درکوي او که نه. رييس مو ستاسې لپاره له (BAMF) څخه په دې اړه نور مالومات هم ترلاسه کولای شي.

که چېرې جاب‌سنټر يا د کار اداره د دندې لپاره د جرمني ژبې په کورس کې ستاسې ګډون ومني؛ لګښتونه به‌ يې هم دوی ورکړي. که کار کوئ او غواړئ د ژبې مهارتونه مو نور هم لوړ کړئ؛ د دې کورس نيم لګښتونه بايد خپله ورکړئ. البته له خپل ريیس/ې هم پوښتلای شئ چې دا لګښتونه درکوي او که نه.