خوندي هېوادونه

په جرمني کې هر هغه هېواد ته خوندي يا امن هېواد وايي چې څوک پکې په عام ډول د دولت له لوري تر څار لاندې نه نيول کيږي او دولت وکړای شي خپل وګړي د نادولتي څارنې او ځورونې له ګواښ څخه خوندي کړي. که څوک خوندي هېوادونو آلمان ته راغلی وي؛ د مهاجرت او کډوالو فدرالي اداره (BAMF) انګيري چې هغه په جرمني کې خونديتوب ته اړتيا نه لري. دا کس وروسته بيا د پناغوښتنې په پروسه کې بايد ثابته کړي چې دا خبره ناسمه ده او بايد پنا ورکړل شي.

په عمومي ډول لاندې هېوادونه په جرمني کې خوندي هېوادونه ګڼل کيږي: البانيا، بوسنياهرزګوينا، ګانا، کوسوو، مقدونيا، مونتنيګرو، سنيګال، سربيا، جورجيا ، مولدووا او د اروپايي ټولنې ټول غړي هېوادونه.

د نايجريا، مراکش او تونس په اړه هم همدا اوس بحثونه روان دي او ښايي د خوندي هېوادونو په توګه ونومول شي. البته تر اوسه د خوندي هېوادونو په لړ کې نه دي.

د جرمني په اساسي قانون کې د د خوندي هېواد (Herkunftsland) او درېيم خوندي هېواد (sicheren Drittstaat) دواړو يادونه شوې ده. يو کس کېدای شي له يادو شوو هېوادونو راغلی وي. د درېيم هېواد مانا دا ده چې يو څوک د يوه خوندي هېواد له لارې راغلی وي. په دې حالت کې، ستاسې د پنا‌ غوښتنلیک د نا منلو وړ (unzulässig) په توګه رد کیدی شي. په هر حال، دا ممکنه ده چې د خوندیتوب بله بڼه ترلاسه کړئ. د BAMF (د مهاجرت او کډوالو فدرالي دفتر) اداره په دې اړه څو ژبني مالومات وړاندې کوي.

د اصولو له مخې د امن هېوادونو د اوسېدونکو د پناغوښتنې پروسه د نورو هېوادونو د اوسېدونکو د پنا غوښتنې له پروسې سره توپير نه لري خو که د دوی د پنا غوښتنې د قضيې په اړه زر پرېکړه کيږي او پروسه يې په چټکۍ طی کيږي.

همدا شان د خوندي هېوادونو د اوسېدونکو لپاره د انټرويو يا مرکې برخه ډېره مهمه ده. په دې برخه کې بايد اړوند کسان ثابته کړي چې په خپل هېواد کې تر ګواښ لاندې وو او په دې اړه ثبوتونه وړاندې کړي. د مهاجرت او کډوالو فدرالي اداره (‌BAMF) ستاسې په حالت او قضيه ځان پوهوي او ښايي له دې ډلې ځينې کسانو ته په جرمني کې پنا او د استوګنې اجازه ورکړل شي.

د خوندي هېوادونو د ډېرو اوسېدونکو قضيې د (په څرګند ډول بې‌بنسټه) قضيې په توګه رديږي؛ ځکه بمف انګيري چې د دوی کيسه رښتيا نه ده او جرمني ته د اقتصادي دلايلو له مخې راغلي دي.

که د چا قضيه د بې بنسټه قضيې به توګه رد شي؛ بايد زر تر زره غبرګون وښيي. د بېړني اعتراض (Eilantrag) لپاره يوازې يوه اونۍ وخت لرئ. که څوک بېړنی اعتراض ثبت نه کړي؛ ښايي ډيپورټ کړل شي. په دې اړه نور مالومات د پنا د غوښتنې ردېدل په څپرکي کې لوستلای شئ.

• د امن هېوادونو اوسېدونکي بايد د پناغوښتنې د پروسې تر پايه په لومړنيو کمپونو يا ځانګړو استوګنځايونو کې پاته شي. دوی بل ځای ته د لېږدېدو اجازه نه لري.

  د امن يا خوندي هېودونو اوسېدونکي په جرمني کې د کار اجازه نه لري.

  د امن هېوادونو اوسېدونکي د بهرنيانو چارو ادارې (Ausländerbehörde) له اجازې پرته په جرمني کې له يوه ځايه بل ځای ته د سفر کولو اجازه نه لري.

  د خوندي هېوادونو اوسېدونکي د اصولو له مخې د يوځای کېدلو (Integrationskursen) په کورسونو کې د ګډون اجازه نه لري.

  په ځينو فدرالي ايالتونو کې د د دې هېوادونو هغه ماشومان چې په لومړنيو کمپونو کې اوسيږي، ښوونځي ته په تلو نه مکلفيږي. نور مالومات زموږ په بل مالوماتي څپرکي (ښوونځي) کې هم موندلای شئ.