په جرمني کې روغتيايي بيمه

په جرمني کې له ۱۰۰ ډېر روغتيايي شرکتونه شته. له دې ډلې ځينې دولتي او ځينې نور شخصي دي. دا دواړه ډوله د لاسرسي په شرطونو، غوښتل کېدونکې ونډې او ګټو کې يو له بله توپير لري. د اصولو له مخې تاسې کولای شئ د خپل ځان لپاره په خپله خوښه د بيمې يو شرکت غوره کړئ. البته د شخصي بيمې اخستلو پر مهال ځينې محدوديتونه شته: د شخصي بيمې شرکتونه ځينې ځانګړي کسان (ملکي کارکوونکي، د شخصي کاروبار درلودونکي او زده‌کوونکي) او د لوړ عايد ترلاسه کوونکي کارکوونکي تر پوښښ لاندې نيسي. البته دولتي بيمه بيا د خلکو له دندې، ډلبندۍ يا عايد په پام کې نيولو پرته ټول کسان مني.

په دولتي بيمه کې ستاسې ونډه ستاسې له معاش يا عايد سره اړه لري. د ډېر عايد لرونکي کسان ډېره ونډه او د لږ عايد لرونکي کسان لږ پیسې ورکوي. د دې کار لامل دا دی چې د ټولنې ټول غړي وکړای شي په مساوي ډول له روغتيايي بيمې برخمن شي. د دولتي بيمې يو ستر امتياز دا دی چې تر ځانګړو شرطونو لاندې کولای شئ خپل بچيان يا د ژوند ملګرې/ملګری هم له ځان سره په وړيا ډول په بيمه کې شامل کړئ. 

په شخصي بيمه کې د بيمې د ونډې کچه د معاش له اندازې سره اړه نه لري او د هر کس د بيمې ګواښ مهم ګڼل کيږي. د هر چا د بيمې ګواښ د هغه د عمر، جنس، له مخکې شته شرطونو او د ژوند د ډول له مخې محاسبه کيږي. په معمول ډول د شخصي بيمې شرکتونه د دولتي بيمې د شرکتونو په پرتله ډېره ونډه غواړي. ځکه خو د شخصي بيمې درلودونکي ناروغان ځينې وخت په آسانۍ له ډاکټر سره وخت اخستلای شي او غوره چلند ورسره کوي. دوی همدا شان ځينې نور امتيازونه هم لري. البته د شخصي بيمې درلودونکي بايد ډاکټر ته د تګ پر مهال د فيس او درملو ټولې پیسې خپلې ورکړي او بيا يې د بيمې له شرکته بېرته واخلي.

که څوک په رسنيو يا هنري برخه کې کار کوي؛ کولای شي د جرمني د هنرمندانو د ټولنيز خونديتوب صندوق (Künstlersozialkasse", a.k.a KSK) کې د ګډون غوښتنه وکړي. که غوښتنه مو ومنل شي، د بيمې نيمې پیسې به مو دا صندوق ورکړي. 

په جرمني کې ډېر خلک دولتي بيمه لري. که نه پوهېږئ چې کومه بيمه ستاسې لپاره غوره ده، کولای شئ د کاروونکو د خونديتوب سازمان (Verbraucherzentrale) له کارکوونکو مشوره واخلئ. همدا شان کولای شئ په (www.krankenkassen.de) کې د بېلابېلو شرکتونو د تګلارو او امتيازونو پرتله وکړئ. 

يادونه: له شخصي بيمې څخه دولتي بيمې ته ځان بدلول ځينې وخت ډېر ستونزمن او يا ناشوني وي. ځکه نو د بيمې شرکتونو د بدلولو پر مهال له شونو پایلو څخه ځان ډاډه کړئ او ځان ښه وپوهوئ.

د اصولو له مخې د هر شرکت پر وېبسایټ په انلاين ډول د بيمې لپاره ځان ثبتولای شئ. همدا شان کولای شئ د هغوی څانګو او دفترونو ته ورشئ او ځان ثبت کړئ. د ثبت لپاره د پاسپورت اندازه يوه عکس، د اوسېدلو د ځای د ثبت سند او د عايد د اندازې سند (يا له جاب‌سنټر يا سوسيال څخه د مرستې ترلاسه کولو سند) له ځان سره يوسئ. په بريالي ډول له ثبت وروسته به د بيمې کارت د پوسټ په وسيله ترلاسه کړئ. ډاکټر يا روغتون ته د تلو پر مهال بايد دا کارت تل له ځان سره ولرئ.

د دولتي بيمې درلودونکي تر ځانګړو شرطونو لاندې کولای شي خپل بچيان يا د ژوند ملګرې/ملګری هم له ځان سره په وړيا ډول په بيمه کې شامل کړي. دا کسان د کورنۍ بيمې د غړو (Familienversicherung) په نوم ياديږي. البته دا کار يوازې هغه وخت کيږي چې د کورنۍ ياد شوي غړي مو لږ عايد ولري او يا هېڅ عايد ونه لري. د عايد د اندازې او د کورنۍ د غړو شاملولو په اړه د خپل بيمې له شرکته پوښتنه وکړئ او نور مالومات ترلاسه کړئ. هڅه وکړئ چې له دوی سره په ليکلې بڼه اړيکې ونيسئ څو هر څه په ليکل شوي ډول ثبت شي. که وروسته کومه ستونزه پېښه شي؛ کېدای شي په دې سندونو له خپل حقه دفاع وکړئ.

د اولادونو درلودلو پر مهال د هغوی عمر د بيمې په شاملولو کې مهم رول لري. د ماشوم تر اتلس کلنۍ پورې هغه له خپل مور يا پلار سره په دولتي بيمه کې په وړيا ډول شامليږي. که ماشوم کار ونه کړي؛ دا موده تر ۲۳ کلنۍ غزېدلای شي. د لاندې شرطونو لرونکي ځوانان کولای شي تر ۲۵ کلنۍ پورې له کورنۍ بيمې ګټه واخلي:

• ښوونځي ته تلل

• له معاش پرته د حرفوي زده‌کړو ترسره کول 

• په پوهنتون کې زده‌کړه

• د يوه کال لپاره بې‌معاشه رضاکارانه کار (د بېلګې په ډول له هېواده بهر يو کال رضاکارانه کار يا يوه کلنه ټولنيزه يا ايکولوژيکي دوره)

معلول کسان د ټول عمر لپاره له خپل مور او پلار سره بيمه کيږي.

د روغتيايي بيمې د ونډې مياشتنۍ پیسې د بيمې ګډونوال ورکوي. که څوک له سوسيال يا جاب‌سنټره دولتي مرسته ترلاسه کوي او يا د کار له ادارې د بېکارۍ پیسې اخلي؛ دا ادارې به د هغه د بيمې لګښتونه هم ورکړي. که داسې دنده ترسره کوئ چې ټولنيزې بيمې د ورکړې تابع وي؛ ستاسې د روغتيايي بيمې پیسې به هم ستاسې د دارې له لوري په مخامخ ډول د بيمې شرکت ته ولېږل شي. د دې ونډې نيمايي پیسې ستاسې له معاشه ګرځول کيږي او نورې به ستاسې اداره ورکړي. په معمول ډول هغه څوک چې له ۵۳۸ يورو زيات مياشتنی معاش واخلي، اړ دي چې د ټولنيزې بيمې ونډه ورکړي. که څوک نيمه وخت دنده (mini-job) ولري، خپل کاروبار ولري او يا زده‌کوونکی وي؛ بايد د روغتيايي بيمې خپله برخه پیسې په خپله هره مياشت د بيمې د شرکت بانکي اکونټ ته وليږي. 

يادونه: هېڅوک نه شي کولای له روغتيايي بيمي پرته وخت تېر کړي او پیسې ټولې کړي. که څوک يو څه وخت د روغتيايي‌ بيمې پیسې ورنه کړي؛ وروسته بايد ټولې پر يوه ځای ورکړي.

د دولتي بيمې اړوند شرکتونه د ښايست د جراحيو، د شخصي سفر پر مهال د واکسينو او د درملنې د سرپرست لګښتونه نه ورکوي. د اصولو له مخې د غاښونو د يوې برخې درملنه تر پوښښ لاندې ده. ځکه نو غوره ده چې تاسې د ډالۍ کتابچه (Bonusheft) له ځان سره ولرئ. ستاسې د غاښو ډاکټر به په دې کتابچه کې تاييد کړي چې تاسې په منظم ډول (هر شپږ مياشتې يا کال وروسته) د کتنې لپاره ورغلي ياست. که د کالونو په اوږدو کې د تاييد دا پاينټونه جمعه کړئ، د غاښونو د ځينو ګران‌بيه درمنلو پر مهال به ستاسې د بيمې شرکت ځينې لګښتونه درکړي. دا ډول کتابچې د غاښونو له ډاکټر څخه ترلاسه کولای شئ. په دې اړه نور مالومات دلته ومومئ. 

که په کوم روغتون کې بستر شئ، د هرې ورځې لپاره بايد لس يورو خپله ورکړئ. نورې پیسې چې ښايي مقدار يې زيات وي، ستاسې د بيمې شرکت ورکوي.

پاملرنه: که نه غواړئ چې د ځانګړو درملنو لګښتونه په خپله ورکړئ، کولی شئ اضافي بیمه واخلئ. اضافي بیمه یوه اختیاري بیمه ده چې تاسې یې د خپلې قانوني روغتیايي بیمې ترڅنګ اخيستلی شئ. دا کار له تاسې سره مرسته کوي چې هغه لګښتونه پوره کړئ، کوک چې دولتي يا قانوني بیمه یې نه ورکوي. د بېلګې په توګه، دا بيمه ښايي د غاښونو جوړولو، نويو عینکو یا په روغتون کې د ځانګړي خونې لپاره ګټوره وي. البته تاسې خپله اضافي بیمه د خپلو اړتیاوو او هغه څه پر بنسټ غوره کوئ چې تاسې ته مهم دي. 

تاسې کولی شئ اضافي بیمه له خصوصي روغتیايي بیمو، د بيمې له ځانګړو شرکتونو یا کله ناکله له خپلې دولتي روغتیايي بیمې سره واخلئ. د اضافي بیمې اخیستلو مخکې حتماً مشوره ترلاسه کړئ. پر Krankenkassen.de  وېبسایټ مختلفې روغتیايي بیمې سره پرتله کړئ او مناسبه بیمه غوره کړئ.

د اصولو له مخې ناروغان بايد هغه درمل په خپله له درملتون څخه واخلي چې ډاکټر ورته ل‍يکلي دي. په خپل شاوخوا کې د درملتون موندلو لپاره دا وېبسایټ وګورئ. دا چې د کومو درملو پیسې بايد خپله ورکړئ؛ له څو عواملو سره اړه لري:

• که څوک شخصي بيمه ولري، لومړی بايد د درملو پیسې خپله ورکړي. ورسته چې د پیسو بېل او نسخه د بيمې شرکت ته ولېږئ، هغوی به بشپړې پیسې بېرته تاسې ته راوليږي.

• که څوک دولتي بيمه ولري، د ورکول کېدونکو پیسو ډول په دې پورې اړه لري چې درمل د ډاکټر له لوري تجويز شوي او که نه. تجويز شوي درمل هغه درمل دي چې تاسې يې يوازې د ډاکټر په نسخه رانيولای شئ. پخوا تجويز شوي درمل يوازې په ګلابي‌رنګه نسخه اخستل کېدل. د  ۲۰۲۳ له جولای مياشتې راهیسې، ای-نسخه (E-Rezept) ورکول کيږي او د ۲۰۲۴ له جنورۍ راهيسې ټولې ګلابي نسخې په رسمي ډول په ای-نسخې بدلې شوې دي. له ای-نسخې سره، د نورو نسخو غوښتنه اسانه شوې ځکه چې تاسې اړتیا نلرئ بيا ډاکټر ته ورشئ. د ای-نسخې له لارې تاسو کولی شئ د برېښنايي روغتیا کارت (eGK)، د اپلیکیشن یا د کاغذي چاپ له لارې نسخه وکاروئ. د ای-نسخې او اپلیکیشن په اړه لا ډېر معلومات په www.das-e-rezept-fuer-deutschland.de  وېبپاڼه کې موندلی شئ.  د ناتجويز شوو درملو لپاره زرغون رنګه نسخه ورکول کيږي. د اصولو له مخې د ناتجويز شوو درملو ټولې پیسې بايد خپله ورکړئ. د تجويز شوو درملو لپاره ښايي هېڅ يا لږ پیسې وغوښتل شي. البته د غوښتل کېدونکو پیسو اندازه بايد له لس يورو زياته نه وي. د ماشومانو او نويو ځوانانو لپاره تجويز شوي درمل په عمومي ډول په بشپړه توګه د بيمې د شرکت تر پوښښ لاندې وي او له تاسې يې پیسې نه غوښتل کيږي.

يادونه: د درملو اخستلو پر مهال د شخصي ونډې اندازه محدوده ده. که تاسې د خپل ناخالص کلني عايد له ۲٪ زياته برخه په درملو يا درملنه لګولې وي، د کال د پاته مودې لپاره به د نورو لګښتونو له ورکولو معاف شئ. همدا شان که څوک دايمي ناروغي ولري او ګڼو درملو ته اړتيا لري؛ د ناخالص عايد د ۱ په سلو کې له لګولو وروسته به د نورو لګښتونو له ورکولو معاف شي. 

که د چا د درملو د پیسو اندازه د عايد له پورته يادې شوې ۱ يا ۲ سلنې زياته شي، کولی شي د بيمي له خپل اړوند شرکت نه وغواړي چې د کال په پاته موده کې يې د پیسو له ورکړې معاف کړي. د دې کار لپاره بايد د اخستل شوو درملو ټول بېلونه او د عايد د اندازې ثبوت د بيمې اړوند شرکت ته ولېږئ. د بيمې شرکت به د دې سندونو له ارزولو وروسته تاسې ته د معافۍ يو سرټيفيکېټ دروليږي. د درملو پېرلو پر مهال دا سرټيفيکېټ د درملتون کارکوونکو ته ورښکاره کړئ څو د پیسو له ورکولو خلاص شئ. دا معافي د همدې کال لپاره معتبره ده او بل کال بايد بل سرټيفيکېټ ترلاسه کړئ.

د اصولو له مخې د بيمې شرکتونه د اروايي درملنې لګښتونه هم پر غاړه اخلي. البته د دولتي بيمې لرونکي کولای شي يوازې هغو ارواپوهانو ته ورشي چې د دولتي بيمې له لوري تاييد شوي‌ وي (Kassenzugelassene Therapeuten). پام مو وي چې د اروايي درملنې پر مهال د (Kassenzulassung) ټکي ته پام وکړئ. اړوند ډاکټر به په پیل کې ٬٬د مشکوکو لاملونو تشخيص٬٬ یا (Verdachtsdiagnose) وکړي او پایله به يې د بيمې ادارې ته ولېږي. که د هغوی له لوري د درملنې د پیسو د ورکړې تاييد ترلاسه شي، ستاسې درملنه به پیل شي. 

مهم: که په جرمني کې د تایید شوي ارواپوه سره د درملنې ځای نه شئ موندلی، د مرستې ترلاسه کولو لپاره یوه بله لاره هم شته. دا لاره د " Kostenerstattungsverfahren" يا لګښت بېرته ترلاسه کولو بهير په نوم یادیږي. په دې پروسه کې تاسې پخپله یو ارواپوه، حتی که هغه د روغتیايي بیمې لخوا تایید شوی هم نه وي غوره کوئ. تاسې باید لومړی د درملنې لګښت پخپله ورکړئ. وروسته د لګښت رسید روغتیايي بیمې ته وړاندې کوئ او د بېرته ترلاسه کولو غوښتنه کوئ. خو دا کار یو څه ستونزمن کیدای شي، ځکه چې تاسې اړ ياست ځانګړي سندونه او ثبوتونه وړاندې کړئ. له همدې امله، مهمه ده چې مخکې له مخکې ښه مالومات ترلاسه کړئ.

پاملرنه: اروايي درملنه (psychiatrische Behandlung) په دې مانا ده چې تاسې له یو ځانګړي ډاکټر یا رواني درملګر څخه درمل ترلاسه کوئ. دغه درمل مرسته کوي چې رواني نښې لکه خپګان یا د وېري ستونزې کمې شي. خو يوه ارواپوهنيزه درملنه (psychotherapeutische Behandlung) د منظمو خبرو اترو پر بنسټ ده چې له تاسې سره ستاسې د افکارو او احساساتو په ښو پېژندلو او درک کولو کې مرسته کوي. په ځینو حالاتو کې دواړه درملنې یوځای کارولی شئ ترڅو تر ټولو ښه ملاتړ ترلاسه کړئ. د رواني روغتیا په اړه نور مالومات زموږ په بل څپرکي "اروايي درملنه" کې موندلی شئ.

روغتیايي بیمه د هغو مختلفو درمليزو وسایلو لګښت ورکوي چې د یو ډاکټر لخوا توصیه شوي وي. په دې کې د بېلګې په توګه فیزیوتراپي، ارګوتراپي او لوگوپيډي شامل دي. ځینې وختونه د پښو درملنې او ځانګړې فزیکي درملنې لګښت هم ورکول کيږي. د لګښتونو ترلاسه کولو لپاره اړینه ده چې ډاکټر توصیه وکړي او روغتیايي بیمه هغه تصویب کړي. په ځینو حالاتو کې تاسې باید لږ برخه پخپله ورکړئ. له همدې امله بايد د لګښت رسیدونه او نور اسناد وساتئ. د درملنې وسایلو د لګښت بېرته ترلاسه کولو په اړه نور مالومات د روغتیا وزارت او مصرفوونکو مرکز پر وېبسایټونو موندلی شئ.

روغتیايي بیمه د یو لړ ضروري مرستندويو وسایلو لګښت ورکوي. په دې لګښتونو کې لاندې موارد شامل دي:

• عینکې او کانټکټ لینزونه: د ځینې بصري نیمګړتیاوو، له یو ځانګړي عمر څخه وروسته او یا د ځانګړو کلینیکي عکسونو لپاره.

• د اورېدو وسایل: د تایید شوې اوریدنې ستونزې لپاره.

• ویلچیر او د مرستې وسایل: د هغو خلکو لپاره چې د ناروغۍ یا معلولیت له امله د بل چا مرستې ته اړتیا لري.

• مصنوعي غړي او اړوند وسایل: د بدن د غړو یا نورو مرستندويو وسيلو لپاره.

• د ادرار کنټرول وسایل: د ادرار د ستونزې لپاره محصولات.

• اکسیجن: د هغو ناروغانو لپاره چې اضافي اکسیجن ته اړتیا لري.

• د روغتون یا پاملرنې بسترونه: د اړتیا په صورت کې په کور یا د پاملرنې په مرکز کې.

د لګښتونو ترلاسه کولو لپاره اړینه ده چې ډاکټر توصیه وکړي او روغتیايي بیمه هغه تصویب کړي. په ځینو حالاتو کې تاسې باید لږ برخه پخپله ورکړئ. له همدې امله بايد د لګښت رسیدونه او نور اسناد وساتئ. د درملنې وسایلو د لګښت بېرته ترلاسه کولو په اړه نور مالومات د روغتیا وزارت او مصرفوونکو مرکز پر وېبسایټونو موندلی شئ.

د ۲۰۲۱ کال له پیل راهيسې د بيمې شرکت بدلول اسانه شوي دي. د دې کار لپاره یوازې د بيمې له بل شرکت سره نوم ثبتولو ته اړتيا ده او د زړې بيمې کنسلولو ته اړ نه ياست. دا کار یوازې هغه وخت اړين دی چې له دولتي بيمې څخه شخصي بيمې ته ځان بدلول وغواړئ او يا بهر ته سفر وکړئ.

د اصولو له مخې د بيمې د شرکت له غړيتوب اخستو يوازې ۱۲ مياشتې وروسته کولای شئ دا شرکت بدل کړئ. که په يوه نوی ځای کې کار پیل کړئ، بيا هم کولای شئ د بيمې شرکت بدل کړئ. په داسې حالت کې ۱۲ مياشتې محدوديت په پام کې نه نيول کيږي. 

که کوم وخت ناڅاپه د بيمې شرکت د پیسو زياتولو غوښتنه وکړي؛ کولای شئ د لغوه کولو له ځانګړي حق (Sonderkündigungsrecht) څخه ګټه واخلئ او تړون مو له دوولس مياشتو وړاندې لغوه کړئ. 

له خصوصي روغتیايي بیمې څخه قانوني يا دولتي روغتیايي بیمې ته بدلون ممکن دی، خو ستاسې له حالت سره اړه لري. که تاسې له ۵۵ کالونو څخه کم یاست او د کارکوونک‍ي په توګه کار کوئ، همدا شان مو کلنی عاید له ۶۶,۶۰۰ یورو څخه کم وي (په ۲۰۲۴ کال کې) کولی شئ دولتي روغتيايي بيمې ته ځان بدل کړئ. یو بدلون هم د کورنۍ بیمې له لارې ممکن دی؛ که ستاسې د ژوند شریک په دولتي بيمه کې بیمه وي یا د بېکارۍ په صورت کې که د بېکارۍ بیمه ترلاسه کوي. له ۵۵ کلنۍ وروسته بدلون یوازې په ځانګړو حالتونو کې دا کار شونی دی. له بدلون وړاندې ښه مالومات ترلاسه کړئ. د خصوصي روغتیايي بیمې څخه قانوني روغتیايي بیمې ته د بدلون په اړه نور مالومات د مصرف کوونکي مرستې مرکز په وېبپاڼه کې موندلی شئ.

که تاسې په جرمني کې قانوني روغتیايي بیمه لرئ، عموماً په جرمني کې د ننه بیمه یاست. البته ډیری وختونه په بهرنیو هېوادونو کې هم بیمه منل کيږي، د بېلګې په توګه په اروپايي ټولنه، اروپايي اقتصادي زون او سویس هېوادونو کې. له اروپايي ټولنې بهر ته په سفر کولو کې باید وګورئ چې ایا اضافي روغتیايي بیمې ته اړتیا لرئ او که نه. د بهرنیو سفرونو په اړه د بیمې مالوماتو لپاره، له خپلې روغتیايي بیمې سره اړیکه ونیسئ.

پاملرنه: د ترکيې په شان له ځينو هېوادونو سره ځانګړي تړونونه شته چې ستاسې د بیمې ساتنه تضمینوي. دا تړونونه تضمينوي چې تاسې په ترکيه هم د جرمني په شان ډول خدمتونه ترلاسه کړئ. د ترکیې او جرمني د ټولنیزو بیمو تړونونو په اړه نور مالومات دلته موندلی شئ.

که د روغتيايي بيمې کوم شرکت ستاسې ګډون رد کړي او يا ستاسې د درملو يا ډاکټر د پیسو له ورکولو ډډه وکړي؛ کولای شئ د ناروغانو د خپلواکې مشورې ادارې (Unabhängige Patientenberatung) ته شکايت وکړئ. دې ادارې ته زنګ وهل يا مشوره اخستل لګښت نه غواړي خو کارکوونکي يې يوازې په جرمني، عربي، ترکي او روسي ژبو خبرې کوي. که څوک د دولتي بيمې غړيتوب ولري، کولای شي (Aufsichtsbehörden der gesetzlichen Krankenversicherung) ته شکايت وکړي.