د شخصي کاروبار لپاره د جرمني ويزه

که غواړئ له اروپايي ټولنې بهر هېواد څخه راشئ او په جرمني کې يو شرکت جوړ کړئ، بايد د جرمني د کاروبار ويزه (Visum zur Selbständigkeit) او يا هم د استوګنې قانون د ۲۱مې مادې د لومړي بند له مخې د شخصي کاروبار لپاره د استوګنې اجازه (Aufenthaltserlaubnis zur Ausübung einer selbständigen Tätigkeit) ترلاسه کړئ. د دې ويزې يا استوګنې اجازې ترلاسه کولو لپاره بايد لاندې شرطونه پوره کړئ:

-       بايد ثابته کړئ چې ستاسې کاروباري نظريې ته اقتصادي لېوالتيا او يا هم په سيمه کې اړتيا شته.

-       ستاسې کاروباري نظريه بايد د جرمني پر اقتصاد مثبت اغېز ولري.

-       ستاسې د کاروبار بايد له مالي اړخه تضمین ولري.

که غواړئ له اروپايي ټولنې بهر هېواد څخه راشئ او په جرمني کې ازاد کار وکړئ، بايد د جرمني د کاروبار ويزه (Visum zur Selbständigkeit) او يا هم د استوګنې قانون د ۲۱مې مادې د پينځم بند له مخې د ازاد کار لپاره د استوګنې اجازه (Aufenthaltserlaubnis zur Ausübung einer freiberuflichen Tätigkeit) ترلاسه کړئ. د دې ويزې يا استوګنې اجازې ترلاسه کولو لپاره بايد لاندې شرطونه پوره کړئ:

-       ستاسې د کاروبار بايد له مالي اړخه تضمین ولري.

-       د خپل کار لپاره مسلکي جواز لرئ. په دې اړه نور مالومات زموږ په بل مالوماتي څپرکي (په جرمني کې د سندونو رسمي کول) کې لوستلای شئ.

-       که عمر مو له ۴۵ کالونو لوړ وي، بايد ثابته کړئ چې کافي تقاعد لرئ.

که د جرمني ويزې ته اړتيا لرئ، بايد‌ خپل هېواد يا سيمه کې د جرمني سفارت يا کنسولګرۍ ته ورشئ او ضروري سندونه له ځان سره يوسئ. په ياد مو وي چې د ويزې ترلاسه کول ښايي ډېر وخت ونيسي. جرمني ته له راتګ وروسته بايد د بهرنيانو چارو په اړونده اداره (Ausländerbehörde) کې د استوګنې د اجازې غوښتنه وکړئ. د دې کار لپاره بايد په جرمني کې د ثبت او کرايي کور د سندونو په ګډون ټول سندونه له ځان سره ولرئ. په ياد مو وي چې د دې ادارې کارکوونکي ستاسې غوښتنه ارزوي او دا ارزونه ښايي څو مياشتې وخت ونيسي.

دا چې د کومو هېوادونو وګړي جرمني ته د تګ لپاره ويزې ته اړتيا لري، د جرمني د بهرنيو چارو وزارت پر وېبسایټ (auswaertiges-amt.de) يې کتلای شئ.

زموږ په بل څپرکي (د جرمني اوږدمهاله ويزه) کې د ټولو هغو سندونو لړ موندلای شئ چې د جرمني د ويزې ترلاسه کولو لپاره ورته اړتيا ده.

دا چې د شخصي کاروبار د ويزې لپاره نور کوم اضافي سندونه غوښتل کيږي، ستاسې له حالت او د کاروبار له ډول سره اړه لري. په دې اړه د جرمني له سفارت او په جرمني کې د هغې سيمې له د بهرنيانو چارو له ادارې (Ausländerbehörde) نور مالومات ترلاسه کولای شئ، چېرته چې غواړئ کاروبار پيل کړئ.

جرمني ته له راتګ وروسته بايد‌ د دريو مياشتو په موده کې د بهرنيانو چارو په اړونده اداره (Ausländerbehörde) کې د استوګنې د اجازې غوښتنه وکړئ. د دې کار لپاره بايد د پورته يادو شوو سندونو او په جرمني کې د ثبت او کرايي کور د سندونو په ګډون ټول نور سندونه له ځان سره ولرئ. په ياد مو وي چې د دې ادارې کارکوونکي ستاسې غوښتنه ارزوي او دا ارزونه ښايي څو مياشتې وخت ونيسي.

د شخصي کاروبار لپاره د استوګنې اجازه په معمول ډول د درې کالونو لپاره ورکول کيږي. که کاروبار مو بريالی شي او دومره پیسې وګټئ چې په جرمني کې خپل او د کورنۍ د غړو د ژوند لګښتونه پوره کړئ، ښايي د استوګنې د اجازې وخت مو تمديد شي.

په خپل هېواد يا سيمه کې د جرمني له سفارت او يا هم په جرمني کې د هغې سيمې له د بهرنيانو چارو له ادارې (Ausländerbehörde) نور مالومات ترلاسه کولای شئ، چېرته چې غواړئ کاروبار پيل کړئ.