امېدوارې مېرمنې بايد د خپلې امېدوارۍ په لومړيو مياشتو کې هر څلور اونۍ وروسته يو ځل نسايي ولادي ډاکټر يا ډاکټرې ته ورشي. په وروستيو اتو اونيو کې بايد دا کار هرې دوې اونۍ وروسته وشي. دا روغتيايي ازموينې چې د امېدوارۍ د پاملرنې په نوم(Schwangerschaftsvorsorge) ياديږي؛ ډېرې مهمې دي ځکه ډاکټر بايد د مور او ماشوم له روغتيا څخه ځان ډاډمن کړي. که د دوو کتنو تر منځ ښه احساس نه کوئ؛ تر بلې کتنې انتظار مه کوئ او سملاسي له خپل ډاکټر سره اړيکه ونيسئ. ډاکټر يا ډاکټره به هر ځل د کتنې پر مهال ستاسې وزن، د وينې فشار او ادرار د ازموينې پایلې وګوري. ځينې وخت وينه هم د ازموينې لپاره اخستل کيږي. په معمول ډول د امېدوارۍ پر مهال د ماشوم د ودې کتلو لپاره درې ټلويزوني ازموينې هم کيږي. همدا شان د امېدوارۍ پر مهال او له زېږون وروسته له قابلې څخه هم د زېږون، شيدو ورکولو د زېږون لپاره د تياري او وروسته پاملرنې په اړه لارښوونې ترلاسه کولوای شئ. د د امېدوارۍ روغتيايي دوسيه (Mutterpass) له زېږون وړاندې ستاسې سره د ټولو روغتيايي ازموينو په پلانولو او مهالوېش څارلو کې مرسته کوي.
د مېرمنو امېدواري
په جرمني کې امېدوارو مېرمنو ته کوم امتيازونه ورکول کيږي؟
په جرمني کې امېدوارې مېرمنې د بشپړو روغتيايي خدمتونو ترلاسه کولو مستحقې دي. دا مېرمنې کولای شي له کومې څرګندې ناروغۍ پرته له نسايي ولادي ډاکټر يا ډاکټرې سره وګوري او د خپلې يا ماشوم د روغتيا په اړه ورسره مشوره وکړي. په جرمني کې نسايي ولادي ډاکټران او ډاکټرانې دواړه شته او تاسې کولای شئ په خپله خوښه يې غوره کړئ. امېدوارې مېرمنې د جرمني د قانون له مخې ساتل کيږي او د دوی او ماشوم د خونديتوب او هوساينې لپاره ځانګړي قوانين او مقرارت پلي کيږي.
هره امېدواره مېرمن له خپل ډاکټر يا ډاکټرې څخه د امېدوارۍ روغتيايي دوسيه (Mutterpass) ترلاسه کوي؛ په کوم کې چې د امېدوارۍ اړوند ټول پړاوونه او د روغتيايي کتنو سندونه خوندي کيږي. په کار کې هم د امېدوارو مېرمنو حقونه په ځانګړي ډول خوندي دي. ګمارونکې اداره يا شرکت نه شي کولای مېرمنې د امېدوارۍ پر مهال منفکې کړي او بايد پر دې مهال په کارځای کې له ځانګړي خونديتوب برخمنې وي. همدا شان دوی ته له زېږون وړاندې او وروسته له معاش سره رخصت ورکول کيږي. د جنين د غورځولو يا سقط اجازه تر ځانګړو شرايطو لاندې ورکول کيږي.
د ۲۰۱۴ کال د مې مياشتې له لومړۍ نېټې په جرمني کې په ناپېژانده توګه زېږون (vertrauliche Geburt) شونی دی. په دې مانا چې مېرمن کولای شي په روغتون يا کور کې د قابلې تر نظر لاندې په خوندي شرايطو کې د خپل هويت له څرګندولو پرته اولاد نړۍ ته راوړي.
د امېدوارو مېرمنو لپاره روغتيايي خدمتونه او قانوني خونديتوب
مهم
امېدوارې مېرمنې مرستې ته د اړتيا پر مهال د امېدوارو مېرمنو بېړنۍ شمېرې (Schwangere in Not) ته هر وخت او د اونۍ په ټولو ورځو کې ټليفون کولای شي. د دې مرکز د شمېرې (۰۸۰۰۴۰۴۰۰۲۰) له لارې له ښځينه مشاورينو سره په څو ژبو خبرې کولای شئ.